ബുവേനോസ് ഐറിസ്: ലൗകിക ആഡംബരങ്ങളുടെയും വ്യാജസന്തോഷങ്ങളുടെയും പിന്നാലെ പോകാതെ ക്രിസ്തുവിലേക്കു മടങ്ങിവരാൻ യുവാക്കളോട് ആഹ്വാനം ചെയ്ത് ലെയോ പതിനാലാമൻ മാർപാപ്പ.
മുൻകാല തെറ്റുകളും വീഴ്ചകളും സഭയിലേക്കു മടങ്ങിവരുന്നതിന് തടസമല്ലെന്നും ദൈവസ്നേഹം സ്വീകരിക്കാൻ എല്ലാവർക്കും അവസരമുണ്ടെന്നും മാർപാപ്പ ഓർമിപ്പിച്ചു. എന്നാൽ അതിന് ആത്മാർഥമായ മാനസാന്തരവും ജീവിതത്തിൽ മാറ്റം വരുത്താനുള്ള സന്നദ്ധതയും അനിവാര്യമാണെന്നും മാർപാപ്പ വ്യക്തമാക്കി.
ബുവേനോസ് ഐറിസിലെ മോന്യുമെന്‍റോ ദെ ലൊസ് എസ്പാനൊലെസിൽ ചൊവ്വാഴ്ച രാത്രിയിൽ നടന്ന ജാഗരണപ്രാർഥനയിൽ യുവതീ യുവാക്കളെ അഭിസംബോധന ചെയ്യുകയായിരുന്നു മാർപാപ്പ.
ലഹരിമുക്തി നേടി ജീവിതത്തിലേക്കു തിരിച്ചെത്തിയ ഒരു യുവാവിന്‍റെ അനുഭവസാക്ഷ്യത്തിനുശേഷമാണ് മാർപാപ്പ സംസാരിച്ചത്. ഏതു വിധേനയുമുള്ള വിജയം, പണം, ബാഹ്യസൗന്ദര്യത്തോടുള്ള കണ്ണുമൂടിയ ആസക്തി, ജനപ്രീതി, അനിയന്ത്രിതമായ സുഖഭോഗങ്ങൾ എന്നിവ നമ്മെ അടിമകളാക്കുകയാണ് ചെയ്യുന്നത്. മറ്റുള്ളവരുടെ അംഗീകാരം നേടാനായി സമൂഹമാധ്യമങ്ങളിലൂടെ മറ്റുള്ളവരെ അപമാനിക്കാനും വഞ്ചിക്കാനും കള്ളം പറയാനും മടിക്കാത്ത പ്രവണത വർധിച്ചുവരുന്നു. മനുഷ്യനെ അടിമകളാക്കുന്ന ലഹരിവസ്തുക്കളും അശ്ലീലതയും വിറ്റ് ലാഭമുണ്ടാക്കുന്ന ഒരു സംഘം തന്നെ ലോകത്തിലുണ്ട്.
ഫ്രാൻസിസ് മാർപാപ്പയുടെ വാക്കുക ഓർമിപ്പിച്ചുകൊണ്ട് “ആർക്കും വരാം, സഭയുടെ വാതിലുകൾ എല്ലാവർക്കുമായി തുറന്നിട്ടിരിക്കുകയാണ്’’-മാർപാപ്പ പറഞ്ഞു. എത്ര താഴേക്കു പതിച്ചാലും ക്രിസ്തുവിന് നമ്മെ കൈപിടിച്ചുയർത്താൻ സാധിക്കും. സ്നേഹത്തോടെയുള്ള സ്വീകരണം എന്നാൽ പാപങ്ങളോടുള്ള സഹിഷ്ണുതയല്ല. തെറ്റുകൾ തിരുത്താനും മനഃപരിവർത്തനം നടത്താനും ഓരോരുത്തരും തയാറാകണമെന്നും മാർപാപ്പ കൂട്ടിച്ചേർത്തു.
പ്രാർഥന, വിശുദ്ധ കുർബാന, ബൈബിൾ വായന, കുമ്പസാരം എന്നിവയിലൂടെ ആത്മീയജീവിതം ശക്തിപ്പെടുത്താനും മാർപാപ്പ യുവാക്കളെ ആഹ്വാനം ചെയ്തു. വിശക്കുന്നവർക്ക് ഭക്ഷണം നൽകുക, രോഗികളെയും ഏകാന്തത അനുഭവിക്കുന്നവരെയും സന്ദർശിക്കുക തുടങ്ങിയ കാരുണ്യപ്രവൃത്തികളിലൂടെ ക്രൈസ്തവവിശ്വാസം ജീവിതത്തിൽ പ്രകടമാക്കണമെന്നും അദ്ദേഹം പറഞ്ഞു.
പത്തുലക്ഷത്തിലധികം യുവതീയുവാക്കളാണ് ആവേശത്തോടെയും ഭക്ത്യാദരപൂർവവും ജാഗരണപ്രാർഥനയിൽ പങ്കെടുത്തത്.
അർജന്‍റീനയിലെ സന്ദർശനത്തിന്‍റെ അവസാനദിനമായ ഇന്നലെ ലുജാൻ മാതാവിന്‍റെ പ്രസിദ്ധമായ തീർഥാടനകേന്ദ്രവും ബുവേനോസ് ഐറിസിലെ വില്ല ദേവോതോ ഫെഡറൽ ജയിലും മാർപാപ്പ സന്ദർശിച്ചു. ജയിലിലെ തടവുകാരോട് സംസാരിക്കവേ, കുറ്റബോധത്തിൽനിന്നും മാനസാന്തരത്തിലേക്കുമുള്ള വഴികൾ എപ്പോഴും തുറന്നുകിടക്കുകയാണെന്നും പ്രത്യാശ കൈവെടിയരുതെന്നും അദ്ദേഹം ഓർമിപ്പിച്ചു.
ലുജാൻ മാതാവിന്‍റെ ബസിലിക്കയിൽ അർപ്പിച്ച വിശുദ്ധ കുർബാനയോടെയാണ് അർജന്‍റീനയിലെ പരിപാടികൾക്കു സമാപനമായത്. മാർപാപ്പയെ കാണാൻ ലക്ഷക്കണക്കിനു തീർഥാടകരാണ് അവിടെയെത്തിയത്. തുടർന്ന് ലാറ്റിനമേരിക്കൻ പര്യടനത്തിന്‍റെ അടുത്ത ഘട്ടത്തിനായി പെറു തലസ്ഥാനമായ ലിമയിലേക്ക് മാർപാപ്പ യാത്രതിരിച്ചു.
ജനാധിപത്യത്തിൽ മാർപാപ്പയ്ക്കെന്തു കാര്യം!
(ദീപിക മുഖപ്രസംഗം)
അർജന്‍റീനയുടെ പ്രസിഡന്‍റ് ഹാവിയര്‍ മിലെയെ വേദിയിലിരുത്തി ലെയോ പതിനാലാമൻ മാർപാപ്പ നടത്തിയ രൂക്ഷമായ വിമർശനം ലോകത്തെ അതിശയിപ്പിച്ചു. കാരണം, അതിൽ അസാധാരണമായൊരു ധൈര്യത്തിന്‍റെയും നിശ്ചയദാർഢ്യത്തിന്‍റെയും വിശ്വാസ ബോധ്യത്തിന്‍റെയും അടയാളങ്ങളുണ്ട്. പ്രത്യേകിച്ചും തന്നെ സ്വീകരിച്ചാനയിച്ച ഭരണാധികാരിയോട് പറയാൻ തീരുമാനിച്ചതു വേണ്ടെന്നുവയ്ക്കാതിരുന്ന ധൈര്യം. ജനാധിപത്യ സ്ഥാപനങ്ങൾ സംരക്ഷിക്കണമെന്നും അധികാരത്തിനൊക്കെ പരിധിയുണ്ടെന്നുമാണ് അമേരിക്കൻ പ്രസിഡന്‍റ് ഡോണൾഡ് ട്രംപിന്‍റെ ചങ്ങാതിയോട് അദ്ദേഹം തുറന്നടിച്ചത്. പുറത്ത് ജനാധിപത്യവും അകത്ത് ഏകാധിപത്യവുമായി ഒളിച്ചുകളിക്കുന്ന പല രാജ്യങ്ങൾക്കും ഇതു ബാധകമാകും. ഭരണകൂടവിമർശനത്തിൽ ഒതുങ്ങുന്നതല്ല ഈ പ്രസംഗം. തങ്ങളാണ് രാഷ്‌ട്രമെന്ന് അഹങ്കരിക്കുന്ന നേതാക്കളോട്, അവരുടെ ചെയ്തികൾ പിഴയ്ക്കുന്നു എന്നു പറയാനുള്ള ഉത്തരവാദിത്വം സൗകര്യപൂർവം മറന്നവർക്കുള്ള സന്ദേശംകൂടിയാണ്.
തലസ്ഥാനമായ ബുവേനോസ് ഐറിസിലെ ജോര്‍ജ് ന്യൂബെറി അന്താരാഷ്‌ട്ര വിമാനത്താവളത്തിലെത്തിയ മാര്‍പാപ്പയെ പ്രസിഡന്‍റ് നേരിട്ടെത്തി സ്വീകരിക്കുകയായിരുന്നു. പക്ഷേ, ഹൃദയംഗമമായ ആ സ്വീകരണം പ്രീണനത്തിനുള്ള പ്രലോഭനമായില്ല. പ്രസിഡന്‍റിന്‍റെ സാന്നിധ്യത്തിൽ തലസ്ഥാനത്തെ ‘പലാസിയോ ലിബർട്ടാഡ്’ എന്ന സാംസ്കാരിക കേന്ദ്രത്തിലായിരുന്നു പ്രസംഗം. “ജനാധിപത്യം അര്‍ജന്‍റീനയുടെ ചരിത്രപരമായ പൈതൃകമാണ്. അതു സംരക്ഷിക്കാന്‍ ഭരണാധികാരികള്‍ക്ക് വലിയ ഉത്തരവാദിത്വമുണ്ട്. ജനാധിപത്യ സ്ഥാപനങ്ങള്‍ സംരക്ഷിക്കണം. നിയമവാഴ്ചയോടുള്ള ആദരവും സ്ഥാപനങ്ങളുടെ വിശ്വാസ്യതയും ജനാധിപത്യത്തിന്‍റെ നിലനില്‍പ്പിന് അനിവാര്യമാണ്. അധികാരമോഹങ്ങള്‍ക്കും രാഷ്‌ട്രീയ താത്പര്യങ്ങള്‍ക്കും ഉപരി പൊതുനന്മയ്ക്ക് മുന്‍ഗണന നല്‍കണം. സാമ്പത്തികവളര്‍ച്ചയുടെ നേട്ടം എല്ലാവരിലുമെത്തിക്കുകയും യുവാക്കള്‍ക്ക് സ്വന്തം നാട്ടില്‍തന്നെ ഭാവി കെട്ടിപ്പടുക്കാനുള്ള സാഹചര്യമൊരുക്കുകയും വേണം. അഴിമതി ഭരണസ്ഥാപനങ്ങളിലുള്ള ജനങ്ങളുടെ വിശ്വാസം തകര്‍ക്കും. നിര്‍മിതബുദ്ധിയുടെ അതിവേഗ വളര്‍ച്ച ഉയര്‍ത്തുന്ന ധാര്‍മിക ഉത്തരവാദിത്വങ്ങളും ഗൗരവത്തോടെ വിലയിരുത്തേണ്ടതുണ്ട്.”
സ്വതന്ത്ര വ്യാപാരനയങ്ങളെ ന്യായീകരിച്ചുകൊണ്ടാണ് മിലെ മറുപടി പറഞ്ഞത്. ജീവിതം, സ്വാതന്ത്ര്യം, സ്വത്ത് എന്നിവയ്ക്കു പ്രാധാന്യം നൽകുന്നതാണു പാശ്ചാത്യ ജനാധിപത്യമൂല്യങ്ങളെന്നും അദ്ദേഹം കൂട്ടിച്ചേർത്തു. പാശ്ചാത്യ മൂല്യങ്ങളെയോ സ്വതന്ത്ര വ്യാപാരനയങ്ങളെയോ എന്നതിലുപരി, അവയുടെ നടപ്പാക്കൽ പാവങ്ങളെ കൂടുതൽ പാവങ്ങളും ധനികരെ കൂടുതൽ ധനികരുമാക്കുന്ന സ്ഥിതിവിശേഷത്തെയാണ് മാർപാപ്പ വിമർശിച്ചതെന്ന് അദ്ദേഹത്തിന് അറിയാഞ്ഞിട്ടല്ല. 40 വർഷത്തിനു ശേഷമാണ് ഒരു മാർപാപ്പ അർജന്‍റീനയിലെത്തുന്നത്. അതുകൊണ്ട് വലിയ സ്വീകരണമായിരുന്നു. 20 ലക്ഷം പേരാണ് തലസ്ഥാനത്ത് മാർപാപ്പ അർപ്പിച്ച വിശുദ്ധ കുർബാനയിൽ പങ്കെടുത്തത്. എന്നിട്ടും അതിഥി ആതിഥേയനോടു പറയാനുള്ളതു പറഞ്ഞതിനു കാരണമുണ്ട്.
ജാവിയർ മിലെയുടെ കടുത്ത ചെലവുചുരുക്കൽ നയങ്ങൾ പാവപ്പെട്ടവരെയും വിരമിച്ച പെൻഷൻകാരെയും കടുത്ത ദുരിതത്തിലാക്കി. ഭിന്നശേഷിക്കാർക്കുള്ള സഹായങ്ങളും മരുന്നുകൾക്കും മറ്റുമുള്ള ആനുകൂല്യങ്ങളുംപോലും സർക്കാർ വെട്ടിക്കുറച്ചു. മിലെയുടെ അഹന്തയെയും ചൂണ്ടിക്കാണിക്കേണ്ടതുണ്ടായിരുന്നു. അധികാരം കൈയാളുന്നവർ പരിധികൾ തിരിച്ചറിയണമെന്നും ജനാധിപത്യം സംരക്ഷിക്കാൻ പ്രതിപക്ഷ ആശയങ്ങൾ കേൾക്കണമെന്നും മാർപാപ്പ ഓർമിപ്പിച്ചത് അതുകൊണ്ടാണ്. രാഷ്‌ട്രീയ വിമർശകരെയും മാധ്യമങ്ങളെയും മോശം വാക്കുകളിലൂടെ അധിക്ഷേപിക്കുന്ന ജാവിയർ മിലെയുടെ ശൈലിയെ ലക്ഷ്യമിട്ടാണ് ജനാധിപത്യം ശക്തിപ്പെടുത്താൻ വാക്കുകൾ സൂക്ഷ്മതയോടെ ഉപയോഗിക്കണമെന്നു പറഞ്ഞത്. ഫ്രാൻസിസ് മാർപാപ്പയെ അധിക്ഷേപിച്ചിട്ടുള്ള മിലെ, ഇത്തവണ അനുരഞ്ജന സ്വരത്തിലാണ് സംസാരിച്ചത്. എങ്കിലും നയങ്ങൾ മാറ്റുമെന്ന് അധികമാരും പ്രതീക്ഷിക്കുന്നില്ല. പക്ഷേ, അതിന്‍റെ യാന്ത്രികതയിൽ ചതഞ്ഞരയുന്ന മനുഷ്യരുടെ ക്ലേശം വിളിച്ചുപറയാൻ ആരുമില്ലെന്ന ധൈര്യം നഷ്ടമാകും.
ഇക്കൊല്ലം ആദ്യം, യുദ്ധത്തിലും ജനാധിപത്യവിരുദ്ധതയിലും തന്നെ രൂക്ഷമായ ഭാഷയിൽ വിമർശിച്ച ലെയോ മാർപാപ്പയോട് അമേരിക്കൻ പ്രസിഡന്‍റ് ഡോണൾഡ് ട്രംപ് പറഞ്ഞത്, ലോകത്ത് എന്തും ചെയ്യാനുള്ള സൈനികശേഷി അമേരിക്കയ്ക്കുണ്ട്. അതുകൊണ്ട്, യുദ്ധകാര്യങ്ങളിൽ കത്തോലിക്കാ സഭ അമേരിക്കയുടെ പക്ഷം പിടിക്കുന്നതാണ് നല്ലത് എന്നാണ്. പക്ഷേ, മാർപാപ്പ വിമർശനത്തിന്‍റെ മൂർച്ച കൂട്ടി. “യുദ്ധത്തെ ന്യായീകരിക്കാൻ മതത്തെ ഉപയോഗിക്കണ്ട. യുദ്ധക്കൊതിയന്മാരുടെ പ്രാർഥന ദൈവം കേൾക്കില്ലെന്നു മാത്രമല്ല, നിങ്ങളുടെ കൈകൾ രക്തം പുരണ്ടതാണെന്ന് അവൻ പറയുകയും ചെയ്യും.” അർജന്‍റീനയിൽ എന്നല്ല ലോകത്തൊരിടത്തും ഭരണാധികാരികളല്ല, ജനങ്ങളാവണം മതത്തിന്‍റെ മുൻഗണന. നിലപാടുകളുടെ കാര്യത്തിൽ മാത്രമല്ല, അതു തുറന്നു പറയുന്നതിലും ലെയോ മാർപാപ്പ ഭയപ്പെടുന്നില്ല. ജനാധിപത്യത്തിൽ മാർപാപ്പയ്ക്ക് എന്താണു കാര്യമെന്നു ചോദിക്കുന്നവരുണ്ട്. ജനാധിപത്യത്തിലല്ല, ജനാധിപത്യ നഷ്ടത്തിലാണ് മാർപാപ്പ ഇടപെടുന്നതെന്ന് അവർ തിരിച്ചറിയണം.
